06.05.2025. O Colexio de Procuradores de Vigo retomou o pasado mércores a súa actividade normal con 913 escritos e 5.246 notificacións, tras o apagón do luns 28 de abril polo que os profesionais da procura perderon durante preto de 48 horas practicamente todo o acceso á plataforma de xestión de notificacións Lexnet.
O propio día do incidente, as procuradoras e procuradores que operan no Porriño, Ponteareas, Redondela, Tui e Vigo puideron xestionar un total de 2.358 notificacións e elaboraron 167 escritos, ata que pasado o mediodía caeu a rede eléctrica.
Ao día seguinte, martes, a práctica imposibilidade de acceder a Lexnet aínda limitou a actividade dos profesionais a tan só 5 notificacións e 111 escritos, ata que o mércores puideron recuperar o acceso, e a súa actividade, por completo.
O último luns laborable do mes de abril do ano pasado (29 de abril), os profesionais da área de Vigo emitiron 2.820 notificacións e 579 escritos, 3.188 e 510 o martes, respectivamente.
Fotografía: Punto GA-M.Riopa.
