31 marzo 2020. A paralización da vida xudicial non urxente deixou a actividade dos procuradores de Vigo ao 3%. Tras dúas semanas de confinamento e o decreto do estado de alarma o pasado 14 de marzo, os profesionais do Colexio de Procuradores de Vigo xestionaron entre o 23 e 26 de marzo, 356 notificacións e 60 escritos. As cifras rexistradas sitúanse un 50% por debaixo das da primeira semana de confinamento e lonxe das que reflicten a actividade habitual dos profesionais antes da expansión da pandemia, cunha media de 12.488 notificacións e 1.978 escritos semanais.
O Colexio de Procuradores de Vigo, como servizo esencial para a cidadanía e os profesionais, mantén a súa actividade no seu horario habitual coa concentración de todos os seus servizos nas súas oficinas de Vigo. Como medida de prevención e compromiso coa saúde de todos, recoméndase a utilización de vías telemáticas para a comunicación co Colexio, así como o seguimento das medidas recomendadas polas autoridades sanitarias no caso de que sexa necesario acudir aos xulgados.
